Thursday, February 27, 2014

ဒေါ်အောင်ဆန်းစုကြည်နှင့် ဦးရွှေမန်း ပယ်ချသော်လည်း မျိုးစောင့်ဥပဒေ ပြဌာန်းရေး အစိုးရနှင့်ဆက်လက် ပူးပေါင်းဆောင်ရွက်သွားမည် ဟု ဆို

From :  ပြည်သူ့အာဏာ
သမ္မတဦးသိန်းစိန်က ပေးပို့သော အမျိုးဘာသာ သာသနာကို ကာကွယ်ထိန်းသိမ်း စောင့်ရှောက်နိုင်ရေး ဥပဒေများ ပြဋ္ဌာန်းနိုင်ရေးဆိုင်ရာ သ၀ဏ်လွှာအား အစိုးရနှင့် တရားလွှတ်တော်ချုပ်သို့ ပြန်လည်တာဝန်လွှဲအပ်ခဲ့ခြင်းကို ဒေါ်အောင်ဆန်းစုကြည်နှင့် တိုင်ပင်ညှိနှိုင်း၍ ဆောင်ရွက်ခဲ့ခြင်း ဖြစ်ကြောင်း၊ သံဃာတော်များက အစိုးရနှင့် ပူးပေါင်းဆောင်ရွက်သွားမည် ဖြစ်ကြောင်း သိရသည်။

ယင်းကိစ္စနှင့်ပတ်သက်၍ အရေးပေါ်အစည်းအဝေးတစ်ရပ်ကို နံနက်ပိုင်းတွင် ပြုလုပ်ခဲ့သည် ဟု ပြည်ထောင်စု လွှတ်တော်နာယက က လွှတ်တော်သို့ ရှင်းပြခဲ့ကြောင်း၊ ယင်းဥပဒေများနှင့်ပတ်သက်၍ ပြဌာန်းရန် လိုလားနေသော လွှတ်တော်ကိုယ်စားလှယ်များ ရှိနေသော်လည်း ယင်းတို့၏ သဘောဆန္ဒကို ရယူခြင်း မရှိခဲ့ကြောင်း သိရသည်။

"သမ္မတ သ၀ဏ်လွှာ ရောက်တဲ့နေ့မှာ ဒေါ်အောင်ဆန်းစုကြည်နှင့် သီးသန့် ဆွေးနွေးညှိနှိုင်းခဲ့တယ် လို့ ကြားပါတယ်။ အဓိကအချက်ကတော့ ဒီဥပဒေလေးခု ပြဌာန်းရေးနဲ့ပတ်သက်ပြီး ဒေါ်စုရဲ့ သဘောထားကို ရယူခဲ့တာ ဖြစ်ပါလိမ့်မယ်။ ကိုယ်စားလှယ်အတော်များများက ဒီဥပဒေတွေကို ပြဌာန်းစေချင်တယ်။ အထူးသဖြင့် တိုင်းရင်းသားကိုယ်စားလှယ်တွေပေါ့။ ဥပဒေကြမ်းကော်တီကို လွှဲပြောင်းပေးပြီး လေ့လာသုံးသပ်တာတွေ မလုပ်တော့ဘဲ ဒီလို ဆုံးဖြတ်ပြီး သ၀ဏ်လွှာ ပေးပို့တာကတော့ နာယကကြီး ပြောပြောနေတဲ့ လွှတ်တော် ဆန္ဒ မဟုတ်နိုင်ဘူး လို့ ထင်ပါတယ်။ လွှတ်တော်သဘောထားကို ယူသင့်သလား၊ ဒေါ်အောင်ဆန်းစုကြည်ရဲ့ သဘောထားကို ယူသင့်သလား ရှင်းနေပြီးသားပဲ" ဟု အမျိုးသားလွှတ်တော်ကိုယ်စားလှယ်တစ်ဦးက ပြောဆိုသည်။
အလားတူ လွှတ်တော်သည် ပြည်သူများ၏ ဆန္ဒကို လေးစားရမည် ဖြစ်၍ ဤသို့ ယတိပြတ်ပယ်ချလိုက်ခြင်းကြောင့် လွှတ်တော်အပေါ် သံသယများ ဖြစ်လာနိုင်ကြောင်း၊ မပြီးပြတ်သေးသည့် အငြင်းပွားဖွယ်ရာ လွှတ်တော်ကိုယ်စားလှယ် သုံးဦးကိစ္စလည်း ရှိနေသေးကြောင်း၊ ဒေါ်အောင်ဆန်းစုကြည်နှင့် တိုင်ပင်ပြီး ဆုံးဖြတ်ချက် ချမည် ဆိုလျှင် လွှတ်တော်အစည်းအဝေး ကျင်းပနေသည်မှာ အဓိပ္ပါယ် မရှိတော့ဟု ယူဆနိုင်ကြောင်း ၄င်းက မှတ်ချက်ပြုသည်။

လွှတ်တော်ကိုယ်စားလှယ်များအတွင်း မျိုးစောင့်ဥပဒေလေးခု ပြဌာန်းရေးအပေါ် နိုင်ငံရေးအရ တိုက်ခိုက်ခြင်း ဟု ယူဆကြသူများ ရှိနေသလို နိုင်ငံအတွက် လိုအပ်ချက် ဟု မှတ်ယူထားကြသူများလည်း ရှိနေရာ ပြည်ထောင်စုလွှတ်တော် နာယက၏ လုပ်ဆောင်ချက်မှာ အငြင်းပွားဖွယ်ရာ ဖြစ်နေကြောင်း အထက်ပါ လွှတ်တော် ကိုယ်စားလှယ်က ပြောဆိုသည်။

"ဒီအချိန်မှာ သံသယတွေ ဖြစ်နေတာ ဘာသာပြောင်းခိုင်းတာတွေ၊ မိန်းမ အများကြီးယူနေတာတွေ၊ ကလေးတွေ မဟားဒရားမွေးနေတာတွေ၊ ဒါတွေကို ဥပဒေနဲ့အညီ ထိန်းသိမ်းနိုင်ခြင်း မရှိခဲ့လို့ ပြည်သူတွေအကြားမှာ သံသယတွေ၊ မယုံကြည်မှုတွေ ဖြစ်နေတာပါ။ ကျွန်တော်တို့ကတော့ ဒီ ဥပဒေလေးခု ပြဌာန်းဖို့ သဘောတူယ်။ ထောက်ခံတယ်။ ပြည်သူတွေထဲမှာလည်း အများစုက ဒီသဘောထားအတိုင်း ရှိနေတယ်။ အခု အရေးပေါ်အစည်းအဝေး ဆိုတာကလည်း မနေ့က ဒေါ်အောင်ဆန်းစုကြည်နဲ့လုပ်တဲ့ သီးသန့်အစည်းအဝေး ဆုံးဖြတ်ချက်ပဲ။ လွှတ်တော်အနေနဲ့ ပြည်သူတွေရဲ့ မျက်နှာကို ကြည့်မလား၊ ဒေါ်အောင်ဆန်းစုကြည်ရဲ့ မျက်နှာကို ကြည့်မလား။ အဓိကအချက်က ဒါပါပဲ။ လွှတ်တော်က ပြဌာန်းချင်တဲ့ ဥပဒေတွေဆိုရင် ဘယ်သူကမှ တိုက်တွန်းစရာ မလိုဘဲ အားကြိုးမာန်တက် ရေးဆွဲနေတာ အားလုံး အသိပဲ။ ဒီဥပဒေလေးခုကျမှ အစိုးရနဲ့ တရားရုံးချုပ်က ရေးဆွဲသင့် တယ် ဆိုတာကတော့ သက်သက်မဲ့ ခေါင်းရှောင်တာပဲ လို့ မြင်တယ်" ဟု ရခိုင်တိုင်းရင်းသားလွှတ်တော်ကိုယ်စားလှယ်တစ်ဦးက ပြောဆိုသည်။

"ကျွန်တော်တို့အတွက်တော့ ရှင်းသွားပါပြီ။ ပြည်သူ့အသံ လွှတ်တော်အသံ၊ ပြည်သူ့ဆန္ဒ လွှတ်တော်ဆန္ဒ ဆိုတဲ့ အဓိပ္ပါယ်မရှိတဲ့ ဆောင်ပုဒ်တွေ ထောင်မနေပါနဲ့။ လက်တွေ့ လုပ်ဆောင်ချက်တွေက အဖြေပေးသွားပါပြီ။ ကျွန်တော်တို့ နားလည်တာကတော့ ဒီဥပဒေလေးခု ပြဌာန်းပေးဖို့ ကျွန်တော်တို့ ရဟန်း ရှင်လူတွေက လက်မှတ်ရေးထိုး တောင်းဆိုတယ်။ သမ္မတလက်မှတ်ထိုးတဲ့ သ၀ဏ်လွှာနဲ့ လွှတ်တော်ကို ဆက်ပို့တယ် ဆိုတာက သမ္မတကိုယ်တိုင် ထောက်ခံလက်မှတ်ရေးထိုးတယ် လို့ ကျွန်တော်တို့က ယုံကြည်ထားတယ်။ ဒီတော့ လွှတ်တော်ကိုယ်စားလှယ်တွေဟာ အမျိုး ဘာသာ သာသနာအတွက် အားကိုးအားထား ပြုထိုက်ပါရဲ့လား မေးစရာ မလိုတော့ဘူး လို့ မြင်တယ်။ ဒါပေမယ့် ကျွန်တော်တို့က ဥပဒေပညာရှင်တွေနဲ့ တိုင်ပင်ပြီး ဥပဒေကြမ်းအထိ ပြုစုဖို့ သီတဂူဆရာတော် ဘုရားကြီး လမ်းညွှန်ထားတဲ့အတိုင်း တည်ဆဲဥပဒေတွေလေ့လာပြီး ဥပဒေကြမ်းတွေ ရေးသားပြုစုထားတာတွေ ကျွန်တော်တို့ ရှိပါတယ်။ ဒါတွေကို အစိုးရဆီ ဆက်ပို့မယ်၊ အစိုးရက လိုအပ်တာပြင်ဆင်ပြီးရင် လွှတ်တော်ကို တင်မယ်။ ဒီလမ်းစဉ်အတိုင်း မဖြစ်ဖြစ်အောင် ကျွန်တော်တို့ လုပ်သွားမယ်" အမျိုးဘာသာ သာသနာကာကွယ်စောင့်ရှောက်ရေးအဖွဲ့ (ဗဟို)၏ အထောက်အကူပြု ဥပဒေပညာရှင်တစ်ဦးက ပြောဆိုသည်။

"ဘုန်းကြီးတို့က ဥပဒေကြမ်းအဆင့်အထိ ပြင်ဆင်ထားပြီးသားပါ။ သီတဂူဆရာတော်ဘုရားကြီးရဲ့ မေတ္တာရပ်ခံချက်နဲ့ ပညာရှင်တွေ ကူညီပြီး လုပ်ပေးနေတာတွေ ရှိပါတယ်။ ဒါကို လွှတ်တော်ကို တင်ပြပေးမယ့် လွှတ်တော်ကိုယ်စားလှယ်တစ်ချို့လည်း ရှိပြီးသားပါ။ အခုအခြေအနေအတိုင်း ဆိုရင်တော့ လွှတ်တော်က ဘုန်းကြီးတို့ ဆန္ဒ သဘောထားကို ပယ်ချလိုက်တာပေါ့။ ဒါဆိုရင်လည်း သမ္မတနဲ့ အစိုးရဘက်က တင်ပြနိုင်အောင် ဆက်လက်ကြိုးပမ်းသွားမှာပါ။ လွှတ်တော်က ဘုန်းကြီးတို့ကို လျှော့တွက်လွန်းတယ် ထင်ပါတယ်" ဟု အမျိုးဘာသာ သာသနာကာကွယ်စောင့်ရှောက်ရေးအဖွဲ့ ဦးဆောင် သံဃာတော်တစ်ပါးက မိန့်ကြားသည်။

"ကျွန်တော့်အမြင် ပြောရရင် လွှတ်တော်က ခေါင်းရှောင်လိုက်တာပဲ။ အမျိုးသားရေးကို ကျောခိုင်းလိုက်တာပဲ။ ဘာဖြစ်လို့လဲ ဆိုတော့ ကိုးကွယ်တဲ့ ဘာသာ ကူးပြောင်းမှုက စင်္ကာပူလိုနိုင်ငံတွေမှာ ရှိတယ်။ အစ္စလာမ္မစ်နိုင်ငံတွေ မှာ ရှိတယ်။ သူ့နိုင်ငံလိုအပ်ချက်အရ သူ ပြဌာန်းရတာ။ ဒီကိစ္စဟာ ပြည်သူတွေကြားထဲမှာ အတင်းအကျပ် ဘာသာပြောင်းခိုင်းတာတွေ ရှိခဲ့တယ်။ ဒီလို အတင်းအကျပ် မပြောင်းနိုင်အောင် ဥပဒေနဲ့ ကာကွယ်တားဆီးရမယ်။ ဒါဆို ပြည်သူတွေလည်း စိတ်အေးချမ်းသွားမယ်။ ဒါဆိုရင် ပဋိပက္ခဖြစ်စေမယ့် အကြောင်းရင်းတစ်ခု လျော့သွားမယ်။ ဒါက ပထမအချက်။ ဒုတိယဥပဒေ ဖြစ်တဲ့ လက်ထပ်ထိမ်းမြားခြင်းဆိုင်ရာ ဥပဒေ၊ ဒါကလည်း ရှိပြီး သား ဥပဒေကို နည်းနည်းလေး ပြန်သုံးသပ် ပြင်ဆင်လိုက်ရင် ပြီးသွားပြီ။ လက်ထပ်ထိမ်းမြားတဲ့အခါ စင်္ကာပူမှာဆိုရင် သီးသန့် တရားရုံးတွေ ထားပြီး လက်ထပ်ရတာမျိုး ရှိတယ်။ ဒီနိုင်ငံမှာ ဘယ်ဟာမျိုးနဲ့ သင့်တော်မလဲ။ ဒါကိုလည်း ဆွေးနွေးပြီး ပြင်ဆင်ချက် လုပ်ဖို့ပဲ လိုတယ်။ တတိယ ဥပဒေက ယဉ်ကျေးမှုနဲ့ ကိုက်ညီပြီးသား။ မြန်မာနိုင်ငံသားတွေဟာ တစ်လင်တစ်မယား စနစ်ပဲ ကျင့်သုံးနေကြတာ။ ဒါကိုလည်း ဥပဒေအရ ပြန်ပြီး တရားဝင် လုပ်တဲ့ သဘောပဲ။ လက်မခံနိုင်စရာ မကြောင်းမရှိဘူး။ နောက်ဆုံးဥပဒေကလည်း ဒီကနေ့ နိုင်ငံတကာကျန်းမာရေးနဲ့ လူမှုရေးအဖွဲ့အစည်းတွေ တွန်းအားပေး လုပ်ဆောင်နေတဲ့ လုပ်ငန်းစဉ်ပဲ။ ဆင်းရဲနွမ်းပါးမှု လျှော့ချရေးနဲ့ လူဦးရေ တိုးပွားနှုန်းထိန်းသိမ်းရေးဟာ အဓိက ဆက်စပ်နေတယ်။ ဒါပေမယ့်လည်း ကာယကံရှင်ကိုယ်တိုင် ကျေကျေနပ်နပ် လက်ခံနိုင်ဖို့ ဥပဒေနဲ့အညီ ထိန်းသိမ်းဖို့ လိုတယ် လို့ ကျွန်တော်တို့က ရှုမြင်တယ်။ ဒါကြောင့် လွှတ်တော်က ပယ်ချလိုက်တာဟာ အမျိုးသားရေးကို လျစ်လျူရှုလိုက်တဲ့ သဘောပဲ" ဟု တရားလွှတ်တော်ရှေ့နေတစ်ဦးက ၄င်း၏အမြင်ကို ပြောကြားသည်။

"ပြည်ထောင်စုလွှတ်တော် နာယက သ၀ဏ်လွှာမှာ ပါတဲ့ လူသားအရေး ဆိုတာ ဘာလဲ။ စကားကို လှည့်ထားတာ။ လူ့အခွင့်အရေးကို ပြောချင်တာ။ လူ့အခွင့်အရေးနဲ့ အမျိုးသားရေး ဘယ်ဟာကို ဦးစားပေးမလဲ ဆိုတဲ့ အနေအထားမှာ လွှတ်တော်က လူ့အခွင့်အရေးကို ဦးစားပေးလိုက်တာပါပဲ။ ကျွန်တော်တို့ကတော့ တစ်နိုင်ငံလုံးမှာ လှုပ်ရှားမှုတွေ ဆက်ပြီး လုပ်ဆောင် သွားမှာပါ" ဟု မြန်မာအမျိုးသားကွန်ရက် ဦးဆောင်သူတစ်ဦးက ပြောဆိုသည်။

ကိုးကွယ်ရာဘာသာကူးပြောင်းခြင်းဆိုင်ရာ ဥပဒေ၊ လက်ထပ်ထိမ်းမြားခြင်း ဆိုင်ရာ ဥပဒေ၊ တစ်လင်တစ်မယားစနစ်ကျင့်သုံးခြင်းဆိုင်ရာ ဥပဒေ၊ လူဦးရေ တိုးပွားနှုန်းထိန်းညှိခြင်းဆိုင်ရာ ဥပဒေများကို ပြဌာန်းနိုင်ရေး သမ္မတက ပြည်ထောင်စုလွှတ်တော်သို့ သ၀ဏ်လွှာပေးပို့ခဲ့ရာ ပြည်ထောင်စု လွှတ်တော်နာယကက ပယ်ချလိုက်ခြင်း ဖြစ်သည်။

No comments:

Post a Comment