မီဒီယာဆိုသည်မှာ နိုင်ငံ၏ အုပ်ချုပ်ရေးမဏ္ဍိုင်၊ ဥပဒေပြုရေးမဏ္ဍိုင်၊ တရားစီရင်ရေးမဏ္ဍိုင် ဆိုသည့် မဏ္ဍိုင် ၃ ရပ်ကိုအလွဲသုံးမှု မဖြစ် ရအောင်၊မယိုင်လဲရအောင် ထောက်ပြပေးသည့် ဒေါက်တိုင်တစ်ခုဖြစ်သည်။ မီဒီယာ၏ အရေး ပါမှုကို အသိအမှတ်ပြု၍ စတုတ္ထမဏ္ဍိုင် ဟု ပင် ခေါ်ဆိုကြသည်။ ဒီမိုကရေစီနိုင်ငံတစ်ခုတွင် မီဒီယာခေါ် စတုတ္ထမဏ္ဍိုင်သည် လွန်စွာအရေး ပါသည်။ စတုတ္ထမဏ္ဍိုင်သည်သာလျှင် ဒီမို ကရေစီစနစ်ကို သိသာထင်ရှားစွာပုံဖော်နိုင်ခြင်းကြောင့် ဖြစ်သည်။
"ငါမကောင်းလျှင်ငါ့အကြောင်းရေး"
"ငါ့မိဖုရားမကောင်းလျှင် ငါ့မိဖုရား အကြောင်းရေး"
"ငါ့သားသမီး မကောင်းလျှင် ငါ့ သားသမီးအကြောင်းရေး" ဆိုသည့် ရှေးခေတ် ဘုရင်တစ်ပါး၏ အဆိုကို ကြည့်လျှင် မီဒီယာဆိုသည်မှာ တိုင်းပြည်အုပ်ချုပ်မင်းလုပ်သူကိုပင် ချန်လှပ်ရိုးထုံးစံမရှိ။ လွတ်လပ်စွာဝေဖန်ရေးသားခွင့်ပေးထားသည်။ မကောင်းလျှင်မကောင်းသလို ကောင်းလျှင် ကောင်းသလိုဖော်ထုတ်ရေးသားရမည် မှာ လုံးဝအမှန် တရားပင်ဖြစ်သည်။ သို့သော် ထိုအမှန်တရားတွင် ပြည်သူ့အကျိုးပါရမည်။
ယနေ့ခေတ် ဒီမိုကရေစီစနစ်နှင့်အတူ ပေါ်ထွက်လာသည့် မီဒီယာကဏ္ဍသည် အလုံးစုံမဟုတ် လျှင်တောင်ထိုက်သင့်သလျောက် ရေးသားဖော်ပြ ခွင့် လွတ်လပ်မှုရှိနေ သည်မှာ မငြင်းသာပေ။ လွတ်လပ်မှုရှိလာသည့်အလျောက်မီဒီယာသည် ပို၍ တာဝန်ရှိလာသည်။ အာဏာရှိလာ သည်။ကိုယ့် တာဝန် ကိုယ်ပိုယူလာရသည်။ မီဒီယာကျင့်ဝတ်ကို သိက္ခာရှိရှိ စောင့်ထိန်း၍ ပြည်သူ့အကျိုးကို ထမ်းဆောင်ရန် ပိုမိုတာဝန်ရှိလာသည်။ တရားသောဘက်မှ ရပ်တည်ပေးရန်မှာ မီဒီယာတို့၏ တာဝန်ပင်ဖြစ်သည်။
မီဒီယာများ စတုတ္ထမဏ္ဍိုင်ပီသလာကြပြီလား။ တရားသောဘက်မှာ ရပ်နိုင်ပါပြီသလား။အဆိုပါ
မေးခွန်းသည် ယနေ့ မီဒီယာလောက၏ စမ်းသပ်ခံမှု တစ်ခုဖြစ်သည်။
မီဒီယာသည် အစိုးရ ကို သစ္စာစောင့်သိရန်မလို။ အစိုးရကို အထောက်အကူပြုရန်သာ ဖြစ်သည်။
အစိုးရမကောင်းလျှင် ထောက်ပြ၍ ကောင်းလျှင်ဖော်ပြရမည့် ပြည်သူနှင့် အစိုးရကြား ပေါင်း ကူးပေးသည့်တံတားသဖွယ်သာ ဖြစ်ရမည်။အစိုးရ၏ လုပ်ဆောင်ချက်များသည် ပြည်သူ့ အကျိူး အတွက် အမှန်တကယ် အထောက်အကူပြုသည်မပြုသည်ကို ဝေဖန်ထောက်ပြဖို့က မီဒီယာ၏ တာဝန်သာဖြစ်သည်။မီဒီယာဟူသည် နိုင်ငံနှင့်ပြည်သူ့အကျိုးကို အစဉ်ရှေးရှုသော ပြည်သူများ၏ သစ္စာကို စောင့်သိသောပြည်သူ့သစ္စာခံများသာ ဖြစ်သင့်သည်။ စတုတ္ထမဏ္ဍိုင်ပီသရမည်။ တရားမျှ တရမည်။
မီဒီယာသည် ပြည်သူ့အကျိုးအတွက် အစိုးရကို ဝေဖန်သည်။ လွှတ်တော်ကို ထောက်ပြသည်။
ကိုယ်စားလှယ်တွေအပေါ် စောင့်ကြည့်ရေးသားသည်။ မှန်သည်။ ထိုကိစ္စများသည် မီဒီယာ အလုပ်ဖြစ်သည်။သို့သော် မီဒီယာအချို့သည် မီဒီယာလွတ်လပ်မှုကို အခွင့်ကောင်းယူ၍ နာမည်ကြီး ချင်မှု၊ ဂျာနယ်ရောင်းအားတက်လိုမှု၊ သြဇာရှိလိုမှုများ အပေါ်ဇောင်းပေးလာသည်ကို တွေ့ရသည်။
အချက်အလက်ခိုင်လုံတိကျမှုမရှိသော နောက်ကွယ်က ဖြစ်ရပ်များကိုဂျာနယ်မျက်နှာဖုံး တွင် စာလုံးကြီး ကြီးဖြင့် ဖော်ပြ၍ ပြည်သူများဆီမှ အထင်ကြီးမှု၊ ပိုက်ဆံတို့ကို ပုဂ္ဂိုလ်ရေးတိုက်ခိုက် မှုများနှင့် ရယူလာသည်။ အညှီအဟောက်နှင့် ပေါ်ပင်သတင်းများကို ဦးစားပေး၍ လူစိတ်ဝင်စား
မှုကို ရယူလာသည်။ ထိုမီဒီယာအချို့ကြောင့် သိက္ခာရှိသော မီဒီယာများ၏ မီဒီယာကျင့်ဝတ် အပေါ် အများမှယုံမှားသံသယများ ရှိလာစေသည်။ ထိုအချက်ကို သိက္ခာရှိသော မီဒီယာများကလည်း လက် မ ခံကြ။ ထိုမီဒီယာများသည် မီဒီယာလောကကို ဖျက်ဆီးနေကြသူများဟု ဆိုသည်။
မီဒီယာတာဝန်သည် ပုဂ္ဂိုလ်ရေးအညှီအဟောက်သတင်း၊ ကိုယ်လိုချင်သည့် ဘက်ကို ပုံဖော်ထား သည့် သတင်း။ မဟုတ်မမှန်တာကို ၀ါဒဖြန့်လိုသည့် သက်သက်ဖြင့် ရေးသောသတင်းများကို
ရေးသား ဖော်ပြရန်မဟုတ်။ ထိုသတင်းများကို ပြည်သူတွေကြား ဖြန့်ခြင်းသည် ပြည်သူအပေါ်
သစ္စာဖောက်ခြင်းသာ ဖြစ်ပေလိမ့်မည်။ အဆိပ်အတောက်ရေးသားမှုများသည် အကျိုးမဟုတ်ဘဲ
ဆိုးကျိုးများသာ ကျရောက်စေမည်ကို မီဒီယာစစ်စစ်များက ပို၍ သိပေမည်။
ဒီမိုကရေစီနှင့် မီဒီယာသည် ခွဲခြားမရ။ မီဒီယာလွတ်လပ်ခွင့်ရှိမှုသည် ဒီမိုကရေစီ၏ အနှစ်သာရ
ထဲက တစ်ခုပင်ဖြစ်သည်။ မီဒီယာနှင့် ပြည်သူသည်လည်း တိုက်ရိုက်အချိုးကျသည်။ မီဒီယာသည်
ပြည်သူ့ကိုယ်စားပြုဖြစ်သည်။ မီဒီယာထဲတွင် ပြည်သူ့အသံပါသည်။ ထိုပြည်သူ့အသံကို အစိုးရ သိအောင်ဆက်သွယ်ပေးရမည်မှာ မီဒီယာတာဝန်ဖြစ်သည်။ ထို့ကြောင့် မီဒီယာဟူ သည် ပြည်သူ ကိုကိုယ်စားပြုသော ပြည်သူ့သစ္စာကို စောင့်သိသော မဏ္ဍိုင်တစ်ခုအဖြစ် သမိုင်းကောင်းအောင် ရပ်တည်ရမည်ဖြစ်သည်။ ပြည်သူကို ခုတုံးလုပ်ကာကိုယ်ကျိူးရှာ၍ ပြည်သူ့သစ္စာဖောက်ဖျက်သူများ
မဖြစ်ရအောင် ထိန်းသိမ်းဆင်ခြင်ရမည်မှာ မီဒီယာကောင်းတစ်ခု၏ ကျင့်ဝတ်သာဖြစ်ကြောင်း
ရေးသားလိုက်ရပါသည်။
စတုတ္ထမဏ္ဍိုင်ကို အားကိုးယုံကြည်သူတစ်ဦး
From:OE
No comments:
Post a Comment