Tuesday, August 27, 2013

ပုံနှိပ်ခြင်းနှင့်ထုတ်ဝေခြင်း ဥပဒေမူကြမ်း လွှတ်တော်နှစ်ရပ် အတည်ပြု

ရန်ကုန်မြို့က သတင်းစာ၊ ဂျာနယ်အရောင်းဆိုင်မြင်ကွင်။ (ဒီဇင်ဘာ ၂၈၊ ၂၀၁၂)။
ပြည်သူ့လွှတ်တော်မှာအတည်ပြုပြီးဖြစ်တဲ့ ပြန်ကြားရေး ဝန်ကြီးဌာနက ရေးဆွဲတဲ့ပုံနှိပ်ခြင်းနှင့်ထုတ်ဝေခြင်း ဆိုင်ရာဥပဒေမူကြမ်းကိုဒီကနေ့အမျိုးသား  လွှတ်တော်မှာပါအတည်ပြုလိုက်ပြီ ဖြစ်ပါတယ်။    ပြည်ထောင်စုလွှတ်တော်မှာပါအတည်ပြုပြီးသမ္မတ  လက်မှတ်ရေးထိုးပြီးရင်တော့ဒီဥပဒေကို ပြဌာန်းဖို့ အသင့်ဖြစ်နေပြီလို့ ပြန်ကြားရေးဒုဝန်ကြီး က ပြောပါတယ်။အပြည့်အစုံကိုဆက်သွယ်မေးမြန်းထားတဲ့မဆုမွန်ကတင်ပြပေးထားပါတယ်။
  ပြန်ကြားရေးဝန်ကြီးဌာနက ရေးဆွဲတဲ့ပုံနှိပ်ခြင်းနဲ့ထုတ်ဝေခြင်းဆိုင်ရာဥပဒေမူကြမ်းကို ပြည်သူ့ လွှတ်တော်မှာရောအမျိုးသားလွှတ်တော်မှာပါအတည်ပြု ပြဌာန်းနိုင်ခဲ့ပြီ ဖြစ်ပါတယ်။ ပြန်ကြားရေး ဝန်ကြီးဌာနကတင်သွင်းအဆိုပြုထားတဲ့ဒီပုံနှိပ်ခြင်းနှင့်ထုတ်ဝေခြင်းဆိုင်ရာဥပဒေမူကြမ်းကို ပြည်သူ့ လွှတ်တော်မှာပြီးခဲ့တဲ့ဇူလိုင်လ၄ရက်နေ့ကလွှတ်တော်တွင်းကန့်ကွက်သူမရှိတခဲနက်အတည်ပြုခဲ့ကြ ပြီးလည်း ဖြစ်ပါတယ်။
  မြန်မာနိုင်ငံတွင်းသတင်းပုံနှိပ်သူများနဲ့ထုတ်ဝေသူတွေအတွက်ဥပဒေကိုအတည်ပြု ပြဌာန်းနိုင်ဖို့   ပြန်ကြားရေးဝန်ကြီးဌာနကနေ ရေးဆွဲတင်သွင်းထားတဲ့ပုံနှိပ်ခြင်းနှင့်ထုတ်ဝေခြင်းဆိုင်ရာဥပဒေ မူကြမ်းကိုအမျိုးသားလွှတ်တော်မှာပါဒီကနေ့အတည်ပြုလိုက်တာ ဖြစ်ပါတယ်။

အမျိုးသားလွှတ်တော်မှာလွှတ်တော်အမတ်တွေတင်ပြတဲ့ ပြင်ဆင် ဖြည့်စွက်ချက်တွေနဲ့အတူ ပြန်လည်ပြင် ဆင် ဆွေးနွေးကြပြီးတဲ့နောက်မှာတော့အမျိုးသားလွှတ်တော်မှာနည်းဥပဒေလုပ်ထုံးလုပ်နည်းနဲ့အညီ အတည်ပြုနိုင်ခဲ့တာ ဖြစ်တယ်လို့ ပြန်ကြားရေးဝန်ကြီးဌာနဒုတိယဝန်ကြီးဦးရဲထွဋ်ကဗွီအိုအေမြန်မာပိုင်း ကို ပြောပါတယ်။

“ဟုတ်ပါတယ်ခင်ဗျ။သူတို့ပြီးခဲ့တဲ့အပတ်ကသူတို့တခါ ဆွေးနွေးတယ်။ ဆွေးနွေးတဲ့အခါမှာ အမျိုးသားလွှတ်တော်ရဲ့ဥပဒေကြမ်းကော်မတီက ပြင်ဆင်ဖို့အကြံပြုတဲ့အချက်တွေကိုအမျိုးသားလွှတ်တော် ကိုယ်စားလှယ်တချို့ကလက်မခံနိုင်ဘူးပေါ့နော်။လက်မခံနိုင်လို့သူတို့ပြီးခဲ့တဲ့စနေ၊တနင်္ဂနွေက ပြန်ပြီးတော့   ဆွေးနွေးပြီးတော့မှ ပြန်ပြင်ပြီးတော့မှသူတို့အတည်ပြုလိုက်တာ။ကျနော်တို့ကစတင်သွင်းတာက ပြည်သူ့ လွှတ်တော်ကိုး။အဲ့တော့ ပြည်သူ့လွှတ်တော်လက်ထဲဥပဒေကြမ်းကော်မတီက ရောက်သွားပြီးတဲ့အချိန်ကစလို့ ကျနော်တို့ ပြည်သူ့လွှတ်တော်ရဲ့လုပ်ပိုင်ခွင့်ထဲမှာ ဖြစ်သွားတာပေါ့။ကျနော်တို့ရဲ့ဥပဒေကျတော့ ပြည်သူ့ လွှတ်တော်ကသူကအတည်ပြုပြီးတဲ့အခါမှာသူအတည်ပြုထားတဲ့မူကြမ်းကိုကျနော်တို့အမျိုးသားလွှတ်တော် ကိုပို့တာပေါ့။အမျိုးသားလွှတ်တော်ကသူသဘောတူရင်တူတယ်။မတူရင်သူ ပြင်ချင်တဲ့အချက်တွေ ကို ပြင်လိုက်တယ်။ ပြင်ပြီးလို့ရှိရင်သူတို့ ပြည်သူ့လွှတ်တော်ကို ပြန်ပို့မယ်။ ပြန်ပို့ရှိရင် ပြည်သူ့လွှတ်တော်မှာ   ပြည်သူ့လွှတ်တော်ဥပဒေကြမ်းကော်မတီက ပြန်ပြီးတော့သုံးသပ်ပြီးတော့သူတို့လက်ခံနိုင်ရင်လက်ခံ။ လက်မခံနိုင်ရင်တော့ပူးပေါင်းကော်မတီမှာကျနော်တို့ ပြန်ဆွေးနွေးပြီးတော့မှ ပြည်ထောင်စုလွှတ်တော်ရဲ့ အဆုံးအဖြတ်ကို ခံယူရမှာ”

အများပြည်သူဖတ်ရှုတဲ့ပုံနှိပ်မီဒီယာတွေမှာသတင်းပုံနှိပ်ထုတ်ဝေသူများ လေးစားလိုက်နာရန် နည်းဥပဒေ ပြဌာန်းချက်တွေ ပြဌာန်းပါရှိတဲ့ ပြန်ကြားရေးဝန်ကြီးဌာနက ရေးဆွဲထားတဲ့ပုံနှိပ်ခြင်းနှင့် ထုတ်ဝေခြင်းဆိုင်ရာဥပဒေမူကြမ်းပါအချက်အလက်တွေနဲ့ပတ်သက်ပြီးလည်း ပြန်ကြားရေးဒုတိယဝန်ကြီး ဦးရဲထွဋ် က အခုလို ရှင်းပြပါတယ်။

“အခုကျနော်တို့ကဘာကိုပဲ ပြောလဲဆိုရင်ပုံနှိပ်သူနဲ့ထုတ်ဝေသူတွေအနေနဲ့အချက်၎ချက်ပေါ့။တစ်က ဘာသာရေး၊လူမျိုးရေးခွဲခြားတဲ့ကိစ္စရပ်တွေကိုကျနော်တို့ပုံနှိပ်ဖော်ပြတာမလုပ်ဖို့၊ နှစ်ကတော့ကျနော် တို့ဆူပူအကြမ်းဖက်မှုတွေဖြစ်အောင်လှုံ့ဆော်တဲ့ဟာတွေမလုပ်ဖို့၊သုံးကညစ်ညမ်းစာပေတွေကို ပုံနှိပ်ခြင်းမလုပ်ဖို့၊ လေးကကျနော်တို့မူးယစ်ဆေးဝါးတို့၊ လောင်းကစားတို့လိုမျိုးရာဇ၀တ်မှုတွေကို အားပေးတဲ့ ရေးသားမှုမျိုးတွေကိုမလုပ်ဖို့ဒါပဲကျနော်တို့က ပြောတာခင်ဗျ။ပုံနှိပ်တဲ့သူ(သို့မဟုတ်)ထုတ်ဝေတဲ့သူတစ်ယောက်က အချက်၎ချက်နဲ့ငြိစွန်းတာကိုသူထုတ်ဝေလိုက်တယ်ဆိုပါတော့အဲ့ဒါကိုဆိုရင်တော့အစိုးရအဖွဲ့အစည်းတခုခု ဒါမှမဟုတ်လည်း ပြည်သူတယောက်ယောက်ကဒီထုတ်ဝေစာသည်အဲ့ဒီအချက်၎ချက်ထဲကငြိစွန်းပါတယ်ဆိုပြီးတော့ သူကတိုင်ကြားခွင့်ရှိတာပေါ့။တိုင်ကြားတဲ့အခါကျရင်တော့အခုကျနော်တို့ဆွဲထားတဲ့ပုံစံကတော့ တရားရုံးကိုကျနော်တို့ကအဲ့ဒါကိုလွှဲပေးလိုက်မယ်။တရားရုံးကို လျှောက်ထားပေါ့။တရားရုံးကို လျှောက်ထားတဲ့ ကာလအတွင်းမှာဝန်ကြီးဌာနကနေပြီးတော့မှဒါကိုခဏယာယီဆိုင်းငံ့ထားမယ်။ဆိုင်းငံ့လို့တရားရုံးက ဟုတ်တယ်၊ငြိစွန်းတယ်ဆိုရင်တော့သူ့ကိုအမြဲတမ်းကျနော်တို့ကဆက်ပြီးတော့ထုတ်ဝေဖြန့်ချိခွင့် ပိတ်မှာပေါ့။တရားရုံးကမငြိစွန်းဘူးလို့ဆုံးဖြတ်ရင်တော့ဆက်ပြီးတော့ ပြန်လည်ထုတ်ဝေခွင့်ရမယ်။”

ပြန်ကြားရေးဝန်ကြီးဌာနအနေနဲ့ မြန်မာသတင်းမီဒီယာ ပတ်ဝန်းကျင်ကို လူမှုတာဝန်သိမှု မီဒီယာအဖြစ် ဖော်ဆောင်နိုင်အောင် အခုလို ပုံနှိပ်ခြင်းနှင့် ထုတ်ဝေခြင်းဆိုင်ရာ ဥပဒေကို အတည်ပြုပြဌာန်းနိုင်ဖို့ ကြိုးစားတာသာဖြစ်တယ်လို့ ပြန်ကြားရေးဝန်ကြီး ဒုတိယဝန်ကြီး ဦးရဲထွဋ် က ပြောပါတယ်။

“လူမျိုးရေး၊ ဘာသာရေး ခွဲခြားမှုလို ဟာမျိုးတွေကို လက်လွတ်စပယ် ရိုက်လို့ မရတော့ဘူးပေါ့။ ရိုက်လို့မရလို့ရှိရင်တော့ ကျနော်တို့က လူမှုတာဝန်သိမှု၊ လူ့အဖွဲ့အစည်းပေါ်မှာ တာဝန်သိမှု တိတိကျကျလေး လိုက်နာကျင့်သုံးလာတဲ့ အကျိုးကျေးဇူးတော့ ကျနော်တို့က ရမှာပါ။ ကျန်တဲ့ အစိုးရကို မဝေဖန်ရဘူးတို့ ဘာတို့ဆိုတဲ့ အချက်တွေက ဒီပုံနှိပ်ဥပဒေထဲမှာ လုံးဝ မပါပါဘူး။”

အရေးကြီးတဲ့ စတုတ္ထမဏ္ဍိုင်ဖြစ်တဲ့ မီဒီယာမဏ္ဍိုင် ခိုင်မာမှုရှိအောင် ဒီမိုကရေစီ စံနှုန်းတွေနဲ့အညီ ဥပဒေပြုမှုတွေကို လုပ်ဆောင်သင့်ပြီး မီဒီယာသမားတွေရဲ့ သဘောထားဆန္ဒကိုလည်း လေးစားဖို့ လိုတယ်လို့ အမျိုးသား လွှတ်တော်ကိုယ်စားလှယ် ဦးဖုန်းမြင့်အောင် က ဆိုပါတယ်။ ဥပဒေပါအချက်တွေထဲက ပြင်ဆင်ဖြည့်စွက်လိုတဲ့ အချက်တွေကို ဆွေးနွေးခဲ့ကြတယ်လို့ ဦးဖုန်းမြင့်အောင် က ပြောပါတယ်။

“မဲခွဲရတယ်ဆိုတာ ကျနော်တဦးတည်းကိုပဲ မဲခွဲရတာပါ။ ကျန်တဲ့လူတွေကတော့ ဥပဒေကြမ်းကော်မတီနဲ့ သဘောဆန္ဒတူညီပါတယ်။ ကျနော်ကတော့ ဥပဒေကြမ်းကော်မတီရဲ့ သဘောမတူတဲ့အတွက် ကျနော့်ကိစ္စတခုကိုပဲ လွှတ်တော်က မဲခွဲပေးရတာပါ။”

ပြန်ကြားရေးရဲ့ ဒီဥပဒေမူကြမ်းဟာ မီဒီယာ လွတ်လပ်ခွင့်မရှိဘဲ သတင်းသမားတွေအပေါ်မှာ ကန့်သတ်ဖိနှိပ်မှု၊ ချုပ်ကိုင်မှုတွေ ရှိတယ်ဆိုပြီး သတင်းမီဒီယာသမားတွေဘက်က ပြင်းပြင်းထန်ထန် ကန့်ကွက်ခဲ့ကြတာလည်း ဖြစ်ပါတယ်။ ဒါကြောင့် အခုဆိုရင်တော့ သတင်းမီဒီယာသမားတွေက ဦးဆောင်ပြီး မြန်မာနိုင်ငံ သတင်းစာနယ်ဇင်းကောင်စီက ရေးဆွဲထားတဲ့ သတင်းမီဒီယာ ဥပဒေမူကြမ်းကို အမျိုးသားလွှတ်တော်မှာ အမျိုးသားလွှတ်တော် ကိုယ်စားလှယ် ဦးဖုန်းမြင့်အောင် က တင်သွင်းထားပြီး ဆွေးနွေးတင်ပြဖို့ စောင့်ဆိုင်းနေချိန်ပဲ အခုလို အမျိုးသားလွှတ်တော်မှာ ပြန်ကြားရေးဝန်ကြီးဌာနက ရေးဆွဲထားတဲ့ ပုံနှိပ်ခြင်းနဲ့ ထုတ်ဝေခြင်းလုပ်ငန်း ဥပဒေမူကြမ်းကို အတည်ပြုလိုက်တာ ဖြစ်ပါတယ်။

No comments:

Post a Comment