ပေါက်ကွဲမှုတွေလား၊ သံချောင်းခေါက်သံတွေလား

မြို့ကြီးအချို့မှာ ဗုံးပေါက်ကွဲမှုသတင်းတွေ၊ ဗုံးမပေါက်ကွဲမီ ရှာဖွေတွေ့ရှိတဲ့ သတင်းတွေကို ဖတ်ရပါတယ်။ ကြီးကြီးမားမား ထိခိုက်ပျက်စီးဆုံးရှုံးမှု မရှိတဲ့အတွက် ရင်အေးရပါတယ်။ ဗုံးမပေါက်ကွဲမီ အချိန်မီ ရှာဖွေတွေ့ရှိအောင် စွမ်းဆောင်နိုင်ခဲ့ကြသည့် နယ်မြေခံပြည်သူများနှင့် လုံခြုံရေးတာဝန်ရှိသူများကိုလည်း ကျေးဇူးတင်ရပါသည်။

အင်တာနက်ပေါ်တွင် ပေါက်ကွဲမှုများ၊ မပေါက်ကွဲမီ ရှာဖွေတွေ့ရှိမှုများနှင့် ပတ်သက်၍ စိတ်ပျက်စရာကောင်းအောင် ရေးသားနေသည်များကို တွေ့နေရပါသည်။ အစိုးရဘာလုပ်လုပ် ဆန့်ကျင်မယ်၊ ဝေဖန်မယ်၊ ပုတ်ခတ်မယ်၊ တိုက်ခိုက်မယ်၊ ရှုံ့ချမယ် ဆိုတဲ့ ၀ါဒကို ကိုင်စွဲထားကြသည့် ဦးဦး၊ ဒေါ်ဒေါ်၊ ကိုကို၊ မမ၊ ကြီးကြီး၊ ငယ်ငယ်၊ ပျိုပျို၊ ရွယ်ရွယ် အပေါင်းတို့ခင်ဗျား၊ ကျန်တဲ့ကိစ္စများတွင် အရေးမဟုတ်သော်လည်း ယခုကိစ္စသည် ကလေးအတွေးနှင့် ခြေထိုးရမည့် အလုပ်မဟုတ်ပါ။ ဗုံးပေါက်ကွဲမှု၊ ဗုံးထောင်ထားမှု၊ စသည်တို့သည် အများပြည်သူ လုံခြုံရေးနှင့် သက်ဆိုင်သည့် အရေးကိစ္စ ဖြစ်ပါသည်။ တရားဥပဒေစိုးမိုးရေးကို ခြိမ်းခြောက်သည့် လုံခြုံရေးဆိုင်ရာ ကိစ္စရပ်ဖြစ်ပါသည်။ လူတစ်ဦးတစ်ယောက်၊ တစ်စုတစ်ဖွဲ့၊ တစ်ပါတီတည်းနှင့် သက်ဆိုင်သည့် ကိစ္စရပ်မဟုတ်ပါ။ ပြည်သူတစ်ရပ်လုံးနှင့် သက်ဆိုင်သည့် ကိစ္စရပ်ဖြစ်ကြောင်းကို ပညာရှိသတိဖြစ်ခဲ ဖြစ်နေမည်စိုး၍ ဤနေရာက သတိပေးလိုပါသည်။

သာမန်လူပြိန်းတွေးပဲ တွေးကြည့်စေလိုပါသည်။ သင်သာ အစိုးရအဖွဲ့ဆိုလျှင် ယခုကဲ့သို့ ဗုံးထောင်သည့် လုပ်ရပ်မျိုးကို လုပ်ဆောင်ပါမည်လား။ ဗုံးထောင်မှုများကို လက်ရှိအစိုးရကပဲ အကွက်ကျကျ လုပ်ဆောင်နေသယောင်ယောင် အင်တာနက်ပေါ်တွင် ငါ့စကားနွားရ ရေးသားနေကြသူများနှင့် အဆိုပါ အရေးအသားများအပေါ် ထောက်ခံနေကြသူ၊ ပြန်လည်ဝေမျှနေကြသူများကို အံ့သြရပါသည်။ ဒီမိုကရေစီ နိုင်ငံတော်သစ်ကြီးဆီသို့ ရည်မှန်းကြပါသည်ဆိုသော ကျွန်တော်တို့ကိုယ်တိုင် ပညာဉာဏ်ရှေ့ပန်း၍ မစဉ်းစားနိုင်သေးသ၍၊ ပညာချွန်းဖြင့် ခံစားချက်များကို မထိန်းချုပ်နိုင်သေးသ၍ ရင်လေးဖွယ် ဖြစ်နေဦးမည်သာ ဖြစ်ပါသည်။ လက်ရှိ ပေါက်ကွဲမှုများ၊ ဗုံးထောင်မှုများနှင့် ပတ်သက်၍ လက်ရှိအစိုးရက လုပ်ဆောင်နေသကဲ့သို့ ပြောဆို၊ ဝေဖန်၊ ရေးသားကြသူများအားလုံးကို အတိအလင်း ရှုတ်ချပါသည်။

ကျွန်တော်တို့တွင် အမှားမခံသည့် အရေးကိစ္စများစွာ ရှိနေပါသည်-

မကြာမီ ဆီးဂိမ်းပြိုင်ပွဲ ကျင်းပတော့မည်။ အာဆီယံ ၁၁ နိုင်ငံမှ အားကစားသမားတွေ၊ ဧည့်သည်တွေ လာကြတော့မည်။

အာဆီယံ အလှည့်ကျဥက္ကဋ္ဌ ရာထူးကို ရယူထားသည်။ နိုင်ငံတကာက ခေါင်းဆောင်တွေ၊ ဧည့်သည်တွေ ဥဒဟို လာရောက်ကြတော့မည်။

၂၀၁၅ တွင် အထွေထွေ ရွေးကောက်ပွဲ ကျင်းပမည်။

စသည် စသည် စသည်ဖြင့် များစွာရှိနေပါသည်။

ကလေးအတွေးဟုပဲ ဆိုပါစေ ဥပမာလေးတစ်ခု ပေးလိုပါသည်။

အိမ်တစ်အိမ်တွင် မိသားစု ၅ ဦး ရှိကြသည်။ အဖေ၊ အမေ၊ သားအကြီးဆုံး၊ သမီးလတ်၊ သားငယ် ပေါ့။ တစ်နေ့တွင် အိမ်ဘေးပြတင်းပေါက်က မှန်တစ်ချပ် ကွဲနေသည်ဆိုပါစို့။ အဖေကတွေ့လျှင် ဟေ့... ဒါ ဘယ်သူ့ကြောင့်လဲ မှန်ကွဲနေတယ်။ မိန်းမရေ ဒီနေ့ လက်သမားခေါ်ပြီး ပြန်တပ်ခိုင်းထားလိုက်။ စသဖြင့်ပေါ့။ သားအငယ်ဆုံးလေး တွေ့၍ ဖေဖေရေ၊ မေမေရေ... ဒီမှာ မှန်ကွဲနေတယ်ဟု ပြောလျှင်မူ သားလုပ်လိုက်တာလား၊ သားဆော့လိုက်လို့ ကွဲသွားတာမလား၊ မှန်မှန်ပြော၊ စသဖြင့် ဖြစ်နိုင်ပါသည်။ အစ်ကိုအကြီးဆုံး တွေ့လျှင်မူ အဖေ၊ အမေ ဒီမှာ မှန်တစ်ချပ် ကွဲနေပြီ၊ ဟိုကောင် အငယ်ဆုံးလေး ဘောလုံးကန်ရင်းနဲ့ မှန်သွားပြီထင်တယ်၊ အဖေ့သားက အရမ်းဆော့တာ စသဖြင့်ပေါ့။ ထိုအခါ အငယ်ဆုံးလေးက ပြန်ပြောမည်။ ကျွန်တော့်ကြောင့် မဟုတ်ပါဘူး။ အစ်ကိုကြီး မနေ့ကတုန်းက အဲဒီနားမှာ လေ့ကျင့်ခန်း လုပ်နေတာပဲ။ အစ်ကိုကြီးကြောင့် တစ်ခုခုဖြစ်သွားတာ နေမှာပေါ့။ စသဖြင့်ပေါ့လေ။ ထိုကဲ့သို့ တစ်ယောက်ဆီ တစ်ယောက်ဆီကို သူ့ကြောင့်နိုးနိုး၊ ကိုယ့်ကြောင့်နိုးနိုးနှင့် စွပ်စွဲပြောဆိုနေလျှင် အဖြေရစရာ အကြောင်းမရှိပါ။ အားလုံးစုံညီထိုင်၍ ဘယ်သူလုပ်သလဲ မေးရမည်။ တစ်ဦးဦးက လုပ်သည်ဆိုလျှင် နောက်မလုပ်ဖို့ ပြောရမည်။ မှန်ကိုပြင်ရမည်။ အကယ်၍ တစ်ဦးကမျှ သူတို့ကြောင့် မဟုတ်ကြောင်း ဖြေကြားလျှင်မူ မှန်ကိုတော့ သေချာပေါက်ပြင်ရမည်။ အခြားနည်းလမ်း စဉ်းစားရမည်။ ပြင်ပမှ ခဲလုံးတစ်ခုခု ၀င်လာသောကြောင့် ထိမှန်ပြီး ကွဲသွားတာလည်း ဖြစ်ကောင်းဖြစ်နိုင်သည်။ သို့မဟုတ် လေပြင်းတစ်ချက်အတိုက် ပြတင်းပေါက်နှင့် နံရံရိုက်မိ၍ မှန်ကွဲသွားသည်လည်း ဖြစ်ကောင်းဖြစ်နိုင်သည်။ စသဖြင့်ပေါ့။ အိမ်တစ်အိမ်တွင် မှန်လေးတစ်ချပ် ကွဲသည့်ကိစ္စကို အရေးတယူလုပ်၍ ဤမျှလောက် ရှင်းပြနေရသည်ကို အားနာရပါသည်။ ကျွန်တော်ပြောချင်သည်မှာ မှန်လေးတစ်ချပ်အတွက်တောင် ဒီလောက်ရှုပ်ထွေးသည် ဆိုပါလျှင် ဗုံးပေါက်ကွဲမှု ကဲ့သို့သော လုံခြုံရေးဆိုင်ရာ ကိစ္စရပ်တစ်ခုသည် မည်မျှအထိ နက်ရှိုင်းမည်ကို နှို်င်းစာကြည့်စေလိုခြင်း ဖြစ်ပါသည်။ ဤမျှပြောလျှင် ကျွန်တော်ဘာပြောချင်သည်ကို စာဖတ်သူ သဘောပေါက်ပြီဟု အကြွင်းမဲ့ ယုံကြည်ပါသည်။ အသင်ဘုန်းကြီးကို ကျွန်ုပ် စာမချလိုတော့ပြီ။

ဗုံးပေါက်ကွဲမှုအတွက် တရားခံကို ရှာဖွေခြင်းသည် ကားပေါ်တွင် ခါးပိုက်နှိုက်ခံရ၍ ရဲစခန်းသို့ ကားမောင်းပြီး ကားပေါ်ပါ ခရီးသည်အားလုံးကို ရှာဖွေရသလောက် လွယ်ကူသည် မဟုတ်ကြောင်းကို စာဖတ်သူတို့ ငြင်းချက်မရှိ လက်ခံကြမည်ဟု ထင်ပါသည်။ ထိုအလုပ်ကို လုံခြုံရေးဆိုင်ရာ တပ်ဖွဲ့ဝင်များက ဆောင်ရွက်ပါလိမ့်မည်။ တရားခံကို ဖော်ထုတ်နိုင်ကောင်း ဖော်ထုတ်နိုင်ပါမည်။ သို့မဟုတ် ဖော်ထုတ်နိုင်ချင်မှလည်း ဖော်ထုတ်နိုင်ပါလိမ့်မည်။ တရားခံ ဖော်ထုတ်နိုင်လျှင် မသိချင်ယောင် ဆောင်နေမည်၊ သို့တည်းမဟုတ် အဆိုပါ တရားခံသည် စွပ်စွဲခံရသူသာဖြစ်သည်၊ သူ့ကို အပြစ်ပေးလျှင် နိုင်ငံရေးအကျဉ်းသား စာရင်းသွင်းမည်ဟု ဆုံးဖြတ်ထားသူများအတွက် တရားခံကို မဖော်ထုတ်နိုင်ခဲ့လျှင် လက်ရှိအစိုးရက အဆိုပါဗုံးကို ထောင်သည်ဟု ဝေဖန်ကြပါလိမ့်မည်။ ကိုယ့်ဘာသာကိုယ်သာ ဉာဏ်မျက်စိဖြင့် မြင်အောင်ကြည့်ကြစေလိုပါသည်။

တရားခံ သိသည်ဖြစ်စေ၊ မသိသည်ဖြစ်စေ ကျွန်တော်တို့ သေချာပေါက် လုပ်ရမည်က ကျိုးပေါက်သွားသော လုံခြုံရေးအတွက် ယခင်ကထက် ပိုမို၍ သတိရှိကြရန်၊ ကြပ်မတ်ကြရန်၊ အလေးထားကြရန်၊ ပူးပေါင်းဆောင်ရွက်ကြရန် ဖြစ်ပါသည်။ မိမိသွားလာနေထိုင်ရာ ပတ်ဝန်းကျင်တွင် အမှုမဲ့ အမှတ်မဲ့ မနေထိုင်ဘဲ စူးစမ်းသည့်အသိ၊ ဆင်ခြင်သည့် အသိဖြင့် မသင်္ကာဖွယ်ရာများ တွေ့ရှိပါက သက်ဆိုင်ရာ ရဲတပ်ဖွဲ့များသို့ ဆက်သွယ်ပူးပေါင်း ဆောင်ရွက်ကြရပါမည်။ ဒါသည် နိုင်ငံသားတိုင်း မလွဲမသွေ လုပ်ဆောင်ရမည့် တာဝန်ဖြစ်ပါသည်။ မိမိတို့၏ လုံခြုံရေးကိစ္စ အ၀၀သည် ရဲတပ်ဖွဲ့အပေါ်တွင်သာ တာဝန်ရှိသည်မဟုတ်ဘဲ မိမိတို့ ကိုယ်တိုင်တွင်လည်း တာဝန်ရှိကြောင်း မမေ့ကြစေလိုပါ။ ဘယ်နိုင်ငံမှာမှ သင့်လုံခြုံရေးအတွက် ကျွန်ုပ်တို့ ရဲတပ်ဖွဲ့က ၁၀၀% တာဝန်ယူပါသည်ဟု ပြောဆိုကြသည်ကို ကျွန်တော် မကြားဖူးသေးပါ။ ရှိသည်ဆိုလျှင်လည်း ညံ့ဖျင်းသည့် ကျွန်တော်ကိုဉာဏ်ကို အသိပေးကြစေလိုပါသည်။

ကျွန်တော်တို့နိုင်ငံ၏ ပုံရိပ်ကောင်းဖို့ ကျွန်တော်တို့အားလုံးတွင် တာဝန်ရှိပါသည်။ မြန်မာနိုင်ငံမှာ ဗုံးပေါက်ကွဲမှုတွေ ခဏခဏ ဖြစ်နေတယ်ဟုဆိုလျှင် အစိုးရတစ်ခုတည်းအပေါ် သက်ရောက်မည် မဟုတ်ပါ။ ကျွန်တော်တို့အားလုံး အပေါ်တွင်လည်း အနည်းနှင့်အများ သက်ရောက်ပါလိမ့်မည်။ ငါတို့နိုင်ငံက ဗုံးခဏခဏ ပေါက်တဲ့နိုင်ငံလေကွာဟု ဘယ်သူကမျှ ဂုဏ်ယူစွာ ပြောဆိုလိုကြမည် မဟုတ်ပါ။ ထို့အတွက် ရွှေရောင်လွှမ်းသည့် Golden Land ဆိုသည့် နိုင်ငံကို သွေးရောင်လွှမ်းသည့် Terrorist Land ဖြစ်မသွားအောင် ကာကွယ်စောင့်ရှောက်ရန်သည် ကျွန်တော်တို့ မြန်မာနိုင်ငံသူ နိုင်ငံသားအားလုံးတွင် တာဝန်ရှိသည်ဟု ခံယူပါကြောင်း အလေးအနက် ဖော်ပြလိုပါသည်။

ဗုံးပေါက်ကွဲမှု၊ ဗုံးထောင်မှုသည် အစိုးရ၏ လုံခြုံရေးစနစ်ကို စိန်ခေါ်ခြင်းသက်သက်ဟု ကျွန်တော်တို့တွေ ဥပေက္ခာ ပြုမထားသင့်တော့ပါ။ ဒါသည် ကျွန်တော်တို့အားလုံးကို စိန်ခေါ်ခြင်း ဖြစ်ပါသည်။ ကျွန်တော်တို့ရဲ့ ညီညွတ်မှုကို စိန်ခေါ်ခြင်း ဖြစ်ပါသည်။ ကျွန်တော်တို့ရဲ့ တာဝန်သိမှု၊ တာဝန်ယူမှုကို စိန်ခေါ်ခြင်း ဖြစ်ပါသည်။ အစိုးရကိုချည်း အပြစ်တင် ဝေဖန်မနေဘဲ ကျွန်တော်တို့တွေလည်း တစ်ဦးချင်းစီ ကိုယ်စီတာဝန်ကျေအောင် ဆောင်ရွက်ကြမည်ဆိုလျှင် ဘယ်အကြမ်းဖက်သမားကိုမျှ ဘယ်အစွန်းရောက်ကိုမျှ ကြောက်စရာ အကြောင်းမရှိပါ။ သူ့ကျွန်ဘ၀က လွတ်မြောက်အောင်ပင် ကြိုးပမ်းခဲ့ကြသည့် သမိုင်းကြောင်းရှိသော လူမျိုးများပီပီ ကြုံလာသမျှကို ညီညွတ်ခြင်း၊ စည်းလုံးခြင်း၊ နားလည်ခြင်း၊ အပြန်အလှန်ကူညီခြင်း၊ သံသယမထားခြင်းဖြင့် ၀ိုင်းဝန်းဆောင်ရွက်သင့်ကြပါကြောင်း အကြံပြုလိုပါသည်။

မြန်မာနိုင်ငံတွင် ဖြစ်ပေါ်နေသမျှ အရေးကိစ္စအားလုံးသည် မြန်မာနိုင်ငံသား အားလုံး၏ အရေးကိစ္စများ ဖြစ်ကြပါသည်။ ထို့ကြောင့် ကျွန်တော်တို့တွင်လည်း တာဝန်ရှိပါသည်။

မည်သူ လုပ်ဆောင်သည်ကို ကျွန်တော်တို့ မသိရသေးပါ။
သို့သော် ပေါက်ကွဲမှုတွေ ဖြစ်ခဲ့ပါသည်။
မပေါက်ကွဲသေးတာတွေ တွေ့ခဲ့ပါသည်။
ဒါသည် သံချောင်းခေါက်သံတွေ ဖြစ်ကောင်းဖြစ်နိုင်ပါသည်။
ကျွန်တော်တို့အားလုံး သတိရှိကြပါစို့၊ လက်တွဲကာကွယ်ကြပါစို့။

အမှတ်တရ

ကိုဉာဏ် (ပန်းလောင်မြေ)