Monday, August 4, 2014

" နိုင်ငံကြီးသားပီသစွာ ယဉ်ကျေးသိမ်မွေ့စွာနဲ့ ဝေဖန်အကြံပြုပေးကြပါရန် ဖိတ်ခေါ်ပါတယ်" ~ ဦးရဲထွဋ် (ပြန်ကြားရေးဝန်ကြီး)

From : .. ဦးရဲထွဋ် ( ပြန်ကြားရေးဝန်ကြီးဌာန၊ ပြည်ထောင်စုဝန်ကြီး)
ကျွန်တော်ကို ယနေ့ သြဂုတ်လ ၁ ရက်နေ့မှာ ပြန်ကြားရေး ၀န်ကြီး ဌာန၊ ပြည်ထောင်စုဝန်ကြီးအဖြစ် တာဝန် ပေးအပ်ခြင်း ကို ပြည်ထောင်စုလွှတ်တော်က သဘောတူခဲ့ပြီး နိုင်ငံတော် သမ္မတရုံးက အမိန့်အမှတ် ၁၈/ ၂၀၁၄ နဲ့ ခန့်အပ် တာဝန်ပေးခဲ့ပါတယ်။ကျွန်တော့်ကို ယုံကြည်စွာ တာဝန်ပေး အပ်တဲ့ သမ္မတကြီးနဲ့ တာဝန်ပေးအပ်မှုအပေါ် သဘောတူခဲ့တဲ့ ပြည် ထောင်စုလွှတ်တော်ကို ကျေးဇူးတင်ပါတယ်။ အဲဒီယုံကြည်မှုများနဲ့
ထိုက်တန်တဲ့ ပေးဆပ်မှုအဖြစ် သမ္မတကြီး၏ ပြုပြင်ပြောင်းလဲရေးလုပ်ငန်းစဉ်များတွင် ကိုယ်စွမ်းဥာဏ်စွမ်းရှိသရွေ့ ပါဝင်ထမ်းဆောင် သွားမည်ဖြစ်ကြောင်း ကတိပြုပါတယ်။

ပြန်ကြားရေးဝန်ကြီးဌာနမှာ ရာထူးအဆင့်ဆင့် တိုးမြှင့်တာဝန်ထမ်းဆောင်ခဲ့စဉ်ကာလအတွင်း ကျွန်တော့် အထက် အကြီးအကဲများဖြစ်ခဲ့တဲ့ ပြည်ထောင်စုဝန်ကြီးဦးကျော်ဆန်း၊ ဦးအောင်ကြည်နဲ့ ညွှန်ကြားရေးမှူးချုပ် ဦးချစ်နိုင်တို့ရဲ့ သွန်သင်ဆုံးမမှုများဟာလည်း ယခု တာဝန်သစ်ကို အောင်မြင်စွာထမ်းဆောင်နိုင်ဖို့အတွက် ကြီးမားတဲ့ ပံ့ပိုးမှုများဖြစ်ပါတယ်။

အဲဒီလိုပဲ ဗိုလ်လောင်းဘ၀ကစပြီး ကျွန်တော်အမှုထမ်းသက်တစ်လျှောက် သင်ဆရာ၊ မြင်ဆရာများ၊ အတူလက်တွဲထမ်းဆောင်ခဲ့တဲ့ လုပ်ဖော်ကိုင်ဖက်များ၊ အားပေးကူညီခဲ့တဲ့ မိဘ ညီ အကိုမောင်နှမများနဲ့ ကျွန်တော့်မိသားစုဟာလည်း ဒီတာဝန်ကိုထမ်းဆောင်နိုင်ဖို့အတွက် အထောက်အကူ များဖြစ်ပါတယ်။
ကျွန်တော့်အတွက် ရာထူးတိုးမြှင့်ခံရခြင်းဟာ အခွင့်အရေးကို တိုးမြှင့်ခံစားရန်မဟုတ်ဘဲ တာဝန်ကို ပိုမို ထမ်းဆောင်ရန် ဖြစ်တယ်လို့ပဲ ခံယူထားပါတယ်။

ပြန်ကြားရေးဝန်ကြီးဌာန ပြည်ထောင်စုဝန်ကြီးအဖြစ် အရေးကြီးဆုံးဆောင်ရွက်ရမယ့်လုပ်ငန်းကတော့ အစိုးရ ဌာနများနဲ့ စာနယ်ဇင်းများအကြား တနည်းအားဖြင့် အုပ်ချုပ်ရေးမဏ္ဍိုင်နဲ့ စတုတ္ထမဏ္ဍိုင်ကြား ကျင့်ဝတ်နဲ့ အပြန်အလှန်လေးစားမှုကို အခြေခံတဲ့ ကောင်းမွန်တဲ့ မီဒီယာဆက်ဆံရေးတစ်ခု တည်ဆောက်ဖို့ပဲဖြစ်ပါတယ်။

ဒီလိုလုပ်ဆောင်တဲ့အခါမှာ ကျွန်တော့်ကို ယုံကြည်သူရှိသလို၊ မယုံကြည်သူ၊ လက်မခံနိုင်သူတွေလည်း ရှိမှာ ပါ။ မယုံကြည်သေးသူများလက်ခံလာအောင် ပူးပေါင်းဆောင်ရွက်လာအောင် အစွမ်းကုန်ကြိုးစားပါ့မယ်။ ကျွန်တော့် လုပ်ငန်းများကိုရိုးသားပွင့်လင်းစွာပဲဆောင်ရွက်မှာဖြစ်ပြီး အယူအဆအားလုံး အထူးသဖြင့် မတူ ကွဲပြားတဲ့အမြင် များကို ပိုပြီးအလေးထားနားထောင်ပါ့မယ်။
ကျွန်တော့်ရဲ့ Facebook စာမျက်နှာကိုလည်း ဆက်ပြီးဖွင့်ထားပါ့မယ်။

ဝေဖန်အကြံပြုလိုသူများကလည်း ဒီစာမျက်နှာကနေ နိုင်ငံကြီးသားပီသစွာ ယဉ်ကျေးသိမ်မွေ့စွာနဲ့ ဝေဖန်အကြံပြုပေးကြပါရန် ဖိတ်ခေါ်ပါတယ်။

No comments:

Post a Comment